DAVAO CITY – Nagpabilin gihapong unresolved ang double murder sa magtiayong Atty. Sitti Gilda Mahinay-Sapie ug Muhaimen Sapie nga nahitabo niadtong Hulyo 14 atubangan mismo sa ilang panimalay sa Solariega Subdivision ning Dakbayan sa Davao.
Kini ang giangkon ni Davao City Police Office Chief P/Col. Kirby John Kraft.
Nalangan matud pa niya ang imbestigasyon sa Special Investigation Task Group kon SITG gumikan sa kadaghan sa gihuptang mga kaso ni Atty. Sapie ilabi na sa bangi sa yuta.
Apan, gipasalig nila nga nagapadayon ang ilang imbestigasyon aron matino gayod ang lead sa pagpamusil-patay sa magtiayon Sapie.
Gikumpirma usab ni Kraft nga duna nay mga tagbalay sa Solariega Subdivision nga boluntaryong nakigtambayayong sa kapulisan aron makuhaan og pahayag kalabot sa insidente.
Wala pa usab makahatag og bug-at nga testimonya ang mga saksi sanglit ang pagbuto lang sa armas ang ilang nadunggan, ug wala usab sila makakita sa dagway sa mga posibleng mipusil sa magtiayon.
Duha usab ka Sports Utility Vehicles kon SUVs ang ilang ginasuta karon nga gigamit sa mga suspek sa krimen.
Padayon usab silang nakig-alayon sa Land Transportation Office aron matino na sa hingpit ang gigamit nga sakyanan sa mga suspek.
Kahinumduman nga duha ang ginalantaw sa kapulisan nga anggulo sa krimen, nga mao ang bangi sa yuta ug ang bangi usab tali sa mga Sapie ug sa homeowners association sa Solariega.
