DAVAO CITY – Gipangtaktak sa serbisyo ang 56 ka mga sakop sa Police Regional Office XI tungod sa mga managlahing hinungdan.
Subay sa impormasyon gikan sa tigpamaba sa PRO-XI nga si Police Major Eudisan Gultiano, anaa sa 38 ka mga pulis ang ilang gipapha sa serbisyo sa milabayng tuig samtang anaa na sa 18 ang gitanggal sa buhatan karong tuiga.
Sumala ni Gultiano, ang kasagarang hinungdan sa pagpapha sa mga wala magtinarong nga mga pulis mao ang pagkalambigit sa mga nahisgutan sa mga iligal nga aktibidad, samtang ang uban may kalabutan sa pagpang-abuso sa ilang serbisyo.
Busa, gipahimangnuan ni Gultiano ang mga sakop sa PRO-XI nga tumanon ang ilang gisumpaan nga mao ang paghatag og proteksyon ngadto sa katawhan.
Ang maong pamahayag may kalabutan sa paghukom nga guilty sa korte sa Tarlac kang Police Master Sergeant Jonel Nuezca, kinsa nipusil-patay sa mag-inahang Sonia ug Frank Gregorio gumikan sa pagpabuto og ginabawal nga boga niadtong Disyembre sa milabayng tuig.
Nabuhat ni Nuezca ang krimen atubangan mismo sa iyang dalagitang anak, kinsa nakaaway pa ni Sonia ayha kini gipusil sa ulo.
