DAVAO CITY – Gilugwayan na sa Commission on Elections kon COMELEC ang ilang working hours aron mas daghan ang ilang maatiman sa nagapadayong voter’s registration alang sa 2022 National and Local Elections.
Sugod karong adlawa, alas 8 sa buntag hangtod alas 7 sa gabii na ang ilang working hours matag Lunes hangtod Biyernes.
Abli na usab sila sa Sabado ug sa holidays sa alas 8 sa buntag hangtod alas 5 sa hapon.
Mao na kini ang nabuhat nga pamaagi sa buhatan isip tubag sa mga nagapanawagan nga lugwayan pa ang voter’s registration.
Gikanayon usab ni Attorney Gay Enumerables, Assistant Regional Director sa COMELEC XI, nga nangandam na usab sila sa pagdasok sa mga tawo sa ilang buhatan ilabi na sa ulahing semana sa Setyembre kon ulahing semana sa voter’s registration.
Nanawagan usab ang ilang buhatan nga kung mamahimo, panghimuslan na sa mga buot magparehistro ang bag-ong registration hours aron na usab dili na sila mahago inig abot sa deadline.
Human sa voter’s registration, sugdan na usab sa COMELEC ang filing sa Certificate of Candidacy nga magsugod sa Oktubre 1 hangtod 8 ning kasamtangang tuig.
