DAVAO CITY – Daghanang mga public utility drivers sa Dakbayan sa Davao ang midagsang atol sa katapusang adlaw sa sectoral vaccination alang kanila sa Agro Industrial Foundation College of the Philippines sa Ecoland, Davao City nga gisugdan pa niadtong Hunyo 27 ning kasamtangang tuig.
Gibana-banaang anaa sa 1,000 ka mga drayber ang nahatagan na og first dose sa bakuna sa ulahing adlaw sa pagpamakuna sa Agro vaccination site.
Sukad usab sa pagsugod niini, mokabat na sa kinatibuk-ang 16,500 ka mga drayber ang ila nang nabakunahan.
Gawas pa niini, aduna pud gipanghatag na food packs gikan sa usa ka partylist nga nagarepresenta sa ilang sektor.
Sa pikas bahin, aduna usab mobile vaccination nga gipahigayon sa Calinan ug Panacan ning dakbayan alang sa mga drayber nga nagpuyo sa mga lagyong bahin sa Dakbayan.
Kasamtangan usab nga ginahan-ay ang pagpatuman niini sa Toril District sa mga umaabot nga semana.
