DAVAO CITY – Gibakunahan na ang anaa sa kapin 300 ka mga indibidwal nga lumulupyo gikan sa Punta Dumalag Uno, Matina Aplaya ning Dakbayan, kinsa mga nasunugan niadtong milabayng bulan.
Sila usab ang nahimong benepisyaro sa mobile vaccination alang kanila nga gipahigayon sa Ultra Gym, Samantha Homes, Matina Aplaya ning Dakbayan.
Gipasiugda sa mga opisina sa City Mayor, Vice Mayor, ug sa Department of Health Davao ang maong programa.
Sumala sa mga organizer, gihimo nilang prayoridad ang mga nabiktima sa sunog alang sa pagpamakuna gumikan kay dako ang risgo nga matapdan sila sa COVID-19, ilabi na nga anaa pa ang kadaghanan sa mga evacuation center diin dili malikayan ang mga panagtapok.
Mapasalamaton usab ang mga residente ngadto sa lokal nga panggamhanan tungod hingpit na silang nakabenepisyo sa vaccination program batok sa makamatayng kagaw.
Ang single-dose nga Janssen vaccine ang gihatag kanila aron na usab dili na sila mahago pa nga mubalik alang sa ikaduhang dose.
Kahinumduman nga subay sa mga datos, namatikdan nga epektibo ang Janssen vaccine batok sa mas makatakod nga Delta variant nga anaa na dinhi sa Dakbayan sa Davao.
