DAVAO CITY – Mikabat sa lima ka mga coastal areas sa Mindanao ang nagpabilin pa gihapon karon nga nagpositibo sa paralytic shellfish poison o toxic red tide nga milampas sa regulatory limit sa Bureau of Fisheries and Aquatic Resources (BFAR). \
Sa gipagula nga Shellfish Bulletin No. 23 nga gilagdaan ni Eduardo B. Gongona, BFAR national director, kalakip pa gihapon sa apektado sa ride tide ang Balite Bay sa Mati City, Davao Oriental, Lianga Bay sa Surigao del Sur, Dumanquillas Bay sa Zamboanga del Sur ug Murcielagos Bay sa Zamboanga del Norte, ug Murcielagos Bay (Sapang Dalaga ug Baliangao) sa Misamis Occidental.
Sa uban nga coastal waters sa nasod nga nagpositibo sa toxic red tide ang gilangkuban sa Milagros sa Masbate, coastal waters sa Dauis ug Tagbilaran City sa Bohol, San Pedro Bay sa Western Samar, ug Matarinao Bay sa Eastern Samar.
Nagpahimangno karon ang ahensiya nga tanan nga klase sa shellfish o alamang nga makuha sa nahisgutan nga coastal areas ang dili sumala pa luwas nga kaunon.
Luwas nga kaunon ang isda, nokus, shrimps ingon man alimango, apan siguruhon nga presko kini ug hugasan pag-ayo ug kinahanglan nga kuhaon ang internal organs sama sa hasang ug tina-e ayha kaunon.
Samtang ang mga coastal water sa Mindanao nga nagpabilin ang luwas sa toxic red tide ang gilangkuban sa Panguil Bay, Tangub City ug coastal waters sa Ozamiz City sa Misamis Occidental; Taguines Lagoon, Benoni ug Mahinog sa Camiguin; ingon man coastal waters sa Hinatuan, Cortez ug Lingig, ingon man Bislig Bay sa Surigao del Sur ug pipila ka baybayon sa Luzon ug uban pang parte sa nasud.
