DAVAO CITY – Gibutyag sa Department of Health (DOH) Regional director Dr. Annabelle Yumang nga gimonitor nila karon ang kahimtang sa duruha ka mga indibidwal nga nabakunahan ug managlahi nga brand sa bakuna atol sa ilang ikaduha nga dose.
Gikanayon sa opisyal nga gihulat nila karon ang incident report kung nganong nasayop ang gigamit nga brand sa bakuna.
Gibarugan ni Yumang nga sa kasamtangan, wala pa gitugtan sa nasod ang pagsagol ug mga bakuna gumikan kay kinahanglan pa kini ug dugang nga mga pagtuon.
Naglaum na lamang karon ang opisyal nga dili na subling mahitabo ang susama nga insidente aron masiguro ang kaluwasan sa panglawas sa mga tawo.
Kahinumduman nga aduna nay pipila ka mga nasod ang nagapahigayon ug mixing sa bakuna apan sa kasamtangan wala pa kini gitugot dinhi sa nasod ug kinahanglan nga subayon pa kung dili ba kini mohatud ug grabe nga epekto.
