DAVAO CITY – Nagpahimangno ang Office of the Municipal Planning and Development Coordinator sa lungsod na Nabunturan, Davao de Oro ngadto sa katawhan nga dili basta-basta mupalit ug mga ginatawag na “raw lots” alang sa residential purpose, diin kasagaran sa mga ginapamaligya nga luna iligal tungod wala kini saktong mga papeles gikan sa gobyerno.
Gibuhat nila ang pagpahibalo human nagpagawas ug Notice of Violation ug Cease and Desist Order ang Department of Human Settlements and Urban Development Region XI batok sa usa ka realty company nga namaligya og mga raw lots sa usa sa mga barangay sa Nabunturan, ug mikatag na usab ang ilang pagpamaligya ngadto sa mga kasikbit nga barangay.
Gigamit usab sa nahisgutang kumpanya ang social media alang sa pag-advertise sa ilang ginabaligyang luna.
Ang mga raw lots, gikonsidera usab na agricultural lots na ginabaligya para sa residential subdivision kuno, kung asa wala kini igong permit og lisensya gikan sa gobyerno, walay rehistro para sa maong proyekto, og wala usab development permit.
