DAVAO CITY – Gumikan sa padayong nasinatian nga mga pag-ulan subling nagpahimangno ang lokal nga kagamhanan partikular na ang buhatan sa City Health Office (CHO) ngadto sa publiko nga batasanon ang pagpanglimpiyo sa palibut ilabi na sa mga lugar nga sagad puy-an sa mga lamok.
Tipik lamang kini human nga nakatala ang siyudad ug lima ka mga namatay tungod sa dengue.
Una ng gibutyag ni Beth Banzon, CHO Tropical Diseases Prevention and Control Unit Coordinator and Nutrition Division head, nga kinahanglan dili pa gihapon mokumpiyansa bisan nga nakatala karon ug pag-ubos nga ihap sa mga nagkasakit ug dengue.
Nagpahimangno sab kini sa mga dabawenyos nga ilabay ug tarung ang mga basura ingon man dili pasagdan ang mga plastic ingon man botelya nga masudlan ug tubig nga mamahimong puy-an ug mga lamok nga nagdala ug dengue.
Nanawagan sab si Banzon ngadto sa publiko nga kung makasinate ug kalintura sa unang tulo ka adlaw, posibleng indikasyon na kini sa dengue ug kung moabot na sa unom ka adlaw, mamahimong kritikal na kini sanglit ang uban nga sintomas mamahimo na nga mabati sama na lamang sa nose bleeding, pagpanakit sa tiyan, rashes, dehydration o pagsuka ug dugo.
