DAVAO CITY – Nagpadayon karon ang pagkondena sa pamunoan sa Eastern Mindanao Command (EastMinCom) sa paggamit og mga batan-on aron nga mamahimong miyembro sa New People’s Army (NPA).
Gani nakatala ang military og usa ka 12-anyos nga batang babae nga gihimong child warrior ug namatay sa engkwentro sa milabay nga adlaw.
Una ng gibutyag ni EastMinCom commander Lieutenant General Greg T. Almerol nga padayon sumala pa karon ang gihimong taktika sa mga armadong grupo nga mo-recruit og mga bata aron nga gamiton sa ilang propaganda ug kung mamatay kini sa bakbakan, ipagula gilayon sa mga rebelde nga usa kini ka ordinaryo nga sibilyan.
Gitataw sab ni Almerol, angayan lamang nga tapuson na sa mga NPA ang paggamit sa mga kabataan sa ilang mga kalihokan kung tinud-anay man ang ilang malasakit sa mga nahisgutan.
Mas maayo sumala pa nga pasagdan sa mga rebelde nga manimuyo og malinawon ang mga nahisgutan ug dili ibutang sa delikado ang sitwasyon sa mga nahisgutan.
Sa kasamtangan, giduso na nila ang kaso batok sa mga rebelde gumikan kay tin-aw nga nakalapas ang mga nasangpit sa International Humanitarian Law (IHL).
