DAVAO CITY – Posibleng sumala pa nga pasakahan ang mga responsable nga Barangay Kapitan ug kasong kriminal pinaagi sa regular filing ilabi na kung wala kini gihimo aron lamang pugngan ng pagsaka sa COVID-19 cases sa ilang dapit.
Kini subay sa kamandoan ni Pangulong Rodrigo Duterte nga sikupon ang mga kapitan sa Barangay nga pakyas sa pagpatuman sa prohibition sa mass gatherings sa ilang tagsa-tagsa ka mga lugar.
Una ng gibutuyag ni Police Regional Office (PRO)-11 spokesperson Major Eudisan Gultiano gihulat na lamang nila karon ang guidelines gikan sa PNP National Headquarters ayha ipatuman ang maong kamandoan.
Posible sumala pa nga pasakahan ang mga nahisgutang ug kasong kalapasan sa Republic Act 11332 o Mandatory Reporting of Notifiable Diseases and Health Events of Public Health Concern Act, gumikan sa kawad-on ug koordinasyon ning panahon sa pandemiya.
Una na sab nga gitino sa opisyal nga andam na sila nga ipatuman ang maong kamandoan.
Gitataw ni Gultiano nga kung adunay mga Barangay kapitan nga sad-an, pasakahan kini ug kaso sa kapulisan ilabi na kung ilang masubay nga gipasagdan niini ang mass gatherings sa ilang mga residente. Apan gitino sa nahisgutan nga ipailalom pa gihapon sa due process ang pagpatuman sa kamandoan.
