DAVAO CITY – Subling gitino sa Davao City Police Office (DCPO) nga kadtong mga empleyado nga mouli sa kasikbit nga rehiyon apan nanarbaho dinhi sa dakbayan sa Davao kinahanglan pa gihapon nga mo-presenta ug 72-hour negative RT-PCR Test results sa higayon nga dili dayon kini makabalik sulod sa 24 oras.
Kahinumduman nga una ng gibutyag ni DCPO Director Colonel Kirby John Kraft nga dili pugngan nga mouli sa ilang mga panimalay ang mag authorized persons outside residences (APOR) apan kinahanglan nga makabalik kini sa gitakda nga oras aron nga dili kini mapangayuan ug negative RT-PCR test result.
Kabahin sumala pa ang nahisgutan nga lakang sa Executive Order No. 29 Series of 2021 o pagsagop sa Regional Inter-Agency Task Force For The Management Of Emerging Infectious Diseases – Regional Task Force Against Covid-19 (RIATF – RTF) 11 on Uniformed Border Control measures diin tumong niini nga mapugngan ang pagsaka sa COVID-19 sa dakbayan dili lamang sa dakbayan sa Davao kung dili sa tibuok Davao region.
Pipila sa mga lugar nga gipahugtan karon ang gipatuman nga border security ang gilangkuban sa Marilog District nga duol lamang sa Arakan, Cotabato Province diin kabahin kini sa Region 12 ug Kitaotao, Bukidnon nga kabahin sa Region 10.
