DAVAO CITY – Gumikan sa panagbangga sa duha ka mga sakyanan sa Barangay Suawan, Marilog district ning dakbayan sa Davao misangpot kini sa kamatayon sa usa ka tawo nga giila nga si Ryan Cabanero, 29-anyos ang panuigon.
Gipahayag sa driver sa wing van nga si Angelito Banlasan, nawad-an ug brake ang truck niini hinungdan nga mibangga kini sa nag-unang truck nga adunay plate number NDM-5843.
Gumikan sa nahisgutang panghitabo, naipit ang helper sa nag-unang truck nga si Ryan Cabanero nga misangpot sa kamatayon niini.
Samtang sa pikas nga bahin, nakabsan sa kinabuhi ang usa ka lalaki nga si Almario Ladica, 39-anyos ang panuigon gumikan sa pagkalumos niini sa usa ka man-made lake sa Soler Subdivision, Brgy. New Carmen, Tugbok district ning dakbayan sa Davao kagahapon sa hapon.
Matod pa sa inpormasyon, gi-ataki sa sakit niining epilepsy ang biktima samtang anaa kini sa kilid sa lake hinungdan sa pagkahulog niini sa tubig nga misangpot sa iyang kamatayon.
