-- ADVERTISEMENT --
DAVAO CITY – Wala na masalbar ang kinabuhi sa usa ka lalake human nga gipusil kini sa wala pa mailhing mga suspetsado gahapon buntag sa Purok 16, Brgy. Poblacion, Mawab Davao de Oro.
Base sa imbestigasyon sa Mawab MPS, biktima giilang si Jo-ar Villegas Nuñez, 36-anyos.
Gisaysay sa mga nakakita sa panghitabo nga anaa matud pa sa kilid sa motorsiklo ang biktima dihang gitaparan siya sa suspetsado dayon gipusil gilayon hinungdan sa hinanaling kamatayon niini. Human sumala pa sa panghitabo, misakay sab og motorsiklo ang suspek padung sa wa matino nga direksyon.
Kasamtangan, padayon ang imbestigasyon sa nasampit nga insidente ingon man aron masuta ang motibo sa pagpamusil.
