DAVAO CITY – Gumikan sa pagsaka sa presyo sa karneng baboy ug manok ingon man mga gulay ug uban pang basic goods, laraw karon sa usa ka konsehal ning dakbayan nga iduso ang paghatag ug temporary subsidies sa mga traders ug mag-uuma.
Sumala pa kang Konsehal Pamela Librado-Morata gawas sa nasinatian nga Covid-19 pandemic, laoman nga daghanang pamilya ang pahugtan pa ang ilang budget aron lamang adunay makaon sa ilang lamesa.
Kahinumduman nga daghanang mga naninda ug karne ingon man gulay sa Bankerohan ning dakbayan ang mireklamo na gumikan sa kataas sa presyo nga gipahamtang sa mga suppliers.
Tungod niini, nanawagan ang opisyal sa national ug local governments nga mohatag ug temporary subsidies ngadto sa mga market vendors ilabi na nga adunay sumala pay katakos ang gobyerno nga mopalit sa mga produkto sa mag-uuma dayon ibaligya kini ngadto sa mga konsumante pinaagi sa rate susama sa nahimong lakang dihang nagsugod ang lockdown sa milabay nga tuig.
Pinaagi sa maong lakang, mamahimong maalibyohan ang sobra kataas nga presyo sa mga palaliton.
Mamahimo sab nga gamiton ang Quick Response Fund nga P6.37 billion aron nga itabang sa mga mag-uuma ug konsumante.
