DAVAO CITY – Gipahugtan pa karon sa Task Force Davao ang seguridad sa dakbayan sa Davao ilabi na sa mga checkpoints ug terminals, human ang insidente sa pagpamomba nga nahitabo sa Tulunan, North Cotabato sa milabay nga adlaw.
Sumala pa kang TF Davao Commander Consolito Yecla, nagpakatag na sila og dugang mga personahe sa checkpoints ug nagpahigayon na sab sila ug hugtanon nga inspeksiyon sulod sa mga buses nga mosulod sa siyudad.
Hugtanon sab ang ilang pakiglambigit sa kadumalahan sa Davao City Overland Transport Terminal (DCOTT) alang sa inspeksiyon sa mga buses sa terminal ug nasabutan nga ipatuman ang “no picking up of passengers” gawas sa terminal.
Gawas niini, nakig-alayon na sab sila sa Coast Guard station sa dakbayan alang sa monitoring sa Davao Gulf ingon man sa intelligence group gawas sa siyudad alang sa impormasyon sa mga aktibidad sa terorista sa mga kasikbit nga areas.
Gitambagan sab ni Col. Yecla kadtong mga nakadawat og extortion letter sa mga teroristang grupo nga makiglambigit gilayon sa ilang buhatan aron nga gilayon kini nga maaksiyonan.
Sa bahin sa kapulisan, gibutyag ni Pol. Capt. Rose Aguilar, tigpamaba sa Davao City Police Office (DCPO) nga gimando na karon ni Davao City Police Office Chief Colonel Kirby John Kraft nga magpatuman ang tanan nga mga police stations og 24-hour checkpoints nga mamahimong operational karong semanaha.
Tanan nga mga travelers nga mosulod sa siyudad ug paingon sa checkpoints ang gi-awhag nga makiglambigit ug boluntaryo nga mopailalom sa inspeksiyon aron nga mamahimong hapsay ang dagan.
Samtang gipahimangnoan sab ang mga Dabawenyos kalabot sa “No Unattended Baggage Policy” ilabi na sulod sa mga terminal.
