DAVAO CITY – Mukabat sa 1,000,000 pesos ang damyos nga natala sa nahitabong sunog kagahapong adlawa sa IKP South Bay, Brgy Lapu-Lapu, Agdao ning dakbayan sa dabaw.
Gikatala nga 25 ka mga panimalay ang naugdaw diin gikareport nga electrical arcing ang hinungdan sa sunog.
Hinuon, walay natala nga namatay apan 47 ang ihap sa naapektuhan sa sunog lakip na niini ang mga renters sa nasampit nga lugar.
Halos walay nadala nga kabtangan ang mga biktima gumikan sa ka-paspas sa pagkatag sa kalayo sanglit gama lamang sa mga light materials ang kabalayan.
Una ng gitataw nga nag gikan ang pag ulbo sa kalayo ngadto sa ikaduhang andanas sa panimalay sa residente nga si Catalino Carolina.
Kasamtangan, gipahimutang na sa evacuation center sa barangay ang mga apektadong pamilya ug padayon pa usab nga giimbestigahan kung asa nanukad ug kung unsa ang hinungdan sa nahisgutang sunog.
Gisugdan na usab sa CSSDO ka –abag ang barangay sa pag-ila sa mga pamilya nga nasunugan, partikular na kadtong mga balay nga totally damage.
