DAVAO CITY – Gikonsidera sa Department of Education (DepEd) XI nga karong school year 2020-2021 malampuson sumala pa ang ilang gipatuman nga blended, distance learning modalities sa mga estudyante.
Kini gumikan sa pagbawal sa face-to-face classes sa mga tulunghaan gumikan sa padayon nga bahad sa Covid-19.
Sumala sa pamahayag sa tigpamaba sa DepEd XI Dodong Atillo, bisan paman luyo sa padayon nga bahad sa pandemya nga malampuson matud sila sa paghatag og dekalidad nga edukasyon sa mga estudyante sulod sa duha ka bulan atol sa pagpatuman sa distance learning.
Hinuon, gi-angkon ni Atillo nga mas maayo gihapon ang face-to-face classes kung itandi kini sa distance learning diin mas dali nga ipasabot sa mga estudyante ang mga leksyon sa magtutudlo.
Bisan paman gikonsidera kini nga malampuson, nakasinati gihapon og mga kalisdanan ug problema sa pagpatuman sa distance learning modalities.
