DAVAO CITY – Hugtanon nga idili sa Island Garden City of Samal o IGACOS ang pagpahigayon og Tourism-related ug leisure activities sulod sa maong Isla.
Kini gikumpirma ni Mayor Al David Uy pinaagi sa Facebook post niini nga sugod karong Desyembre 18 bawal na ang mga leisure activities kini gumikan sa padayon nga hulga sa Covid-19.
Gani, lakip na sab niini nga gidili ang tanang mga non-essential movements o ang dili mahinungdanon nga lakaw pasulod sa Isla aron malikayan ang pagtaas sa kaso sa Covid-19. Dugang sa mayor, nga sugod karong Disyembre 18, 2020 hangtod Enero 4, 2021 ipatuman ang maong lakang sa nahisgutan nga lugar.
Samtang, gikatakda nga magpagawas og Executive Order ang LGU Samal kabahin sa maong kamanduon.
Sa pikas bahin, padayon gihapon ang kaso sa African Swine Fever (ASF) sa isla kung diin gibana-banaan nga moabot na sa tres sientos mil ka pesos ang kinatibuk-ang kantidad sa mga binuhing baboy nga gipa-ilalom sa culling sa Island garden City Of Samal human natakbuyan ug African Swine Fever(ASF).
Kini ang subay sa pinaka-ulahing update nga gipagawas sa City Veterinarians office sa IGACOS.
Hugot na usab ang gipatumang seguridad sa Animal Quarantine checkpoint pasulod sa IGACOS aron mapugngan ang pagkuyanap sa ASF human gikatala ang pinaka-unang kaso sa Talicud island.
