DAVAO CITY – Gipailawom sa culling operation ang 158 ka mga binuhing baboy sa Talikud Island, Island Garden City of Samal human nga nakumpirma nga adunay kaso sa African Swine Fever (ASF) ang nahisgutang lugar.
Gibutyag sa tigpamaba sa Department of Agriculture Region XI nga si Noel Provido, anaa sa 40 ka mga hog raiser ang apektado gikan sa 3 ka mga barangay sa Talikud Island gumikan sa ASF.
Posible matud pa nga nakuha ang maong kaso sa mga nagabyahe pasulod sa isla nga nakaapekto sa mga binuhing baboy sa nahisgutang lugar.
Dugang sa opisyal, dili na mamahimong magdala og mga karneng baboy sa isla ilabi na kadtong mga lugar nga apektado sa ASF.
Kahinumdoman nga nagpagawas na og advisory ang IGACOS LGU kalabot sa pagpasulod ug pagpagawas sa mga binuhing baboy ug pork products sa Talicud kini aron mapugngan na ang maong kaso sa nasangpit nga lugar.
