DAVAO CITY – Gitin-aw ni Davao City Mayor Inday Sara Duterte-Carpio nga dili anti-poor ang mga polisiya nga gipatuman karon sa dakbayan sa Dabaw.
Kini ang tubag ni Davao City Mayor Inday Sara Duterte-Carpio sa mga pagpanghinaway sa pipila ka mga netizens human sunod-sunod nga gipagawas ang mga Executive order aron makontrol ang padayong pagsaka sa kaso sa COVID-19 sa dakbayan.
Sumala ni Mayor Inday, bisan og hugot ang pag-regulate sa lihok sa mga tawo, walay gipatumang restrictions sa trabaho ug padayon ang mga esdtablisyemento sa ilang mga negosyo na nasubay sa guidelines sa IATF sa Modified General Community Quarantine o MGCQ.
Hangtud karon daghan lang gihapon ang mga nag-reklamo sa subling pagpatuman sa FM pass, mas gipasayo nga curfew hour, 24 hour liquor ban, ug uban pang mga polisiya nga hugot nagdili sa mga non-essential travel nga sumala pa kanila dugang kalisdanan lamang ilabi na sa mga trabahante nga matag adlaw nagasulod sa ilang trabaho.
Sumala sa Mayor, nasabtan niini ang yangongo sa mga tawo apan kinahanglan usab sumala pang masabtan sa katawhan nga adunay quarantine ug adunay gisunod nga IATF guidelines aron mapugngan ang pagtakod-takod sa kagaw.
Dugang pa ni Mayor Inday, giluagan na sa lokal nga kagamhanan ang mga regulasyon ug gitugyan na niini sa katawhan ang pag-disiplina sa kaugalignon sa pagsunod sa MGCQ guidelines.
Apan, nakita nga kadaghanan sa mga tawo ang wala misunod niini nga maoy nag-unang hinungdan sa padayong pagsaka sa kaso sa COVID-19 karong panahuna dinhi sa syudad.
