DAVAO CITY – Gipahimangnoan ni Davao City Mayor Sara Duterte-Carpio ang publiko nga dili magpailad sa mga tawo nga migamit ang iyang pangalan aron lamang mangayo ug cash aid alang sa mga biktima sa bagyo sa kaulohan.
Gitino ni Mayor Inday nga wala siyay Facebook account ug posibleng ang mipaluyo niini usa ka mangingilad. Wala sab sumala pa siya’y mobile payment ug remittance service account ilalom sa pangalan nga Meddelyn Duterte.
Tungod niini, gitambagan sa Mayor ang mga buot motabang sa mga apektado sa kalamidad nga direktang ipadala ang ilang assistance ngadto sa mga biktima o sa apektadong local government units o sa mga kasaligan nga ahensiya ug organisasyon.
Mihangyo ang Mayor sa publiko ug sa Facebook nga i-report ang mga peke nga accounts nga migamit sa iyang pangalan.
\Nasayran nga dili na matud pa aktibo ang Facebook account sa Mayor sukad kaniadtong tuig 2018 ug mas aktibo karon ang iyang Instagram account.
Sa kasamtangan, mi-alokar na ang lokal nga kagamhanan ug financial assistance sa mga areas nga apektado sa pagkuso-kuso sa Bagyong Quinta ug Rolly.
Wala pay gipagula karon nga pahayag ang siyudad kung mohatag sab kini ug hinabang sa mga areas nga apektado sa Bagyong Ulysses.
