DAVAO CITY – Gi-andam na ang kaso batok sa usa ka 37 anyos nga negosyante nga nasikop sa otoridad human nga namaligya kini ug ilimnong makahubog bisan nga hugtanon karon ang pagpatuman sa liquor ban.
Gilusad ang operasyon pasado ala una sa hapon kagahapon sa J. Adams Street kanto Madison Street, Samantha Homes Subdivision, Matina Pangi, ning dakbayan.
Naila ang dinakpan nga si ROBERT JOHN VENERACION SUMERA @alyas ARJAY, residente sa GSIS Subdivision, Matina Crossing ning siyudad.
Gilusad ang operasyon human nga nakadawat ug impormasyon ang kapulisan kalabot sa illegal nga transaksiyon luyo sa hugtanon nga pagpatuman karon nga pagpatuman sa liquor ban.
Narekober gikan sa dinakpan ang tulo ka case nga gi-undan sa 24 kabuok nga 330ml San Miguel Light Beer; tulo ka case sa 1liter Red Horse Beer; usa ka box nga gi-undan sa 4 ka botelya sa Captain Morgan; usa ka botelya a Jose Cuervo 1liter; sakyanan ug cash nga P17,000.
Kahinumduman nga kaniadtong Oktubre 29, gipagula sa lokal nga kagamhanan ang Executive Order No. 59 diin unod niini nga epektibo sa Nobyembre 2 hangtud Disyembre 31 ning kasamtangan nga tuig, ipatuman ang 24-hour liquor ban sa dakbayan.
Gipasalig ni PMaj Sean Logronio, PS3 commander nga hugtanon nila nga ipatuman ang liquor ban nga nagdili sa pagpamaligya ingon man pag-inom ug alak samtang gipatuman ang community quarantine aron nga batukan ang COVID-19.
Mag-atubang si Sumera ug kasong kalapasan sa RA 11332 diin sakop ang (Liquor Ban).
