DAVAO CITY – Gumikan sa padayon nga pagsaka sa mosquito-borne disease cases sa dakbayan sa Davao, gipalabang na sa 19th City Council ang ordinansa nga mopahamtang ug penalty sa mga indibidwal nga nagapundo ug mga ligid o containers nga sagad maoy himuong breeding site sa mga lamok.
Gi-lobby ni Konsehal Mary Joselle Villafuerte, committee chairperson on health, ang pagpalabang sa maong ordinansa nga gitawag ug “Davao City Mosquito-borne Diseases Prevention and Control Ordinance” kini aron nga makunhuran ang daghanang ihap sa kaso sa viruses o parasites nga dala sa mga lamok sama sa dengue, chikungunya, filaria, Japanese encephalitis, malaria, ug zika virus disease.
Ang maong ordinansa nga napalabang na sa ikatulo ug pinal nga pagbasa nagtumong nga masolusyonan ang health problem ilabi na ngadto sa komunidad.
Sa mga magpataka ug butang sa mga ligid ug batteries, steel o plastic drums ug daghanan pa, mamahimong pahamtangan kini ug multa diin sa first offense, pahamtangan kini ug P1,000 ug duruha ka oras nga community service, samtang P3,000 ug four hours community service ang sa second offense, ug P5,000 ingon man pagkumpiska sa mga items ang sa third offense.
Mamahimo sab nga mapahamtangan ug multa ang mga Business establishments nga madakpan nga nakalapas sa susama nga salaod.
