DAVAO CITY – Gipaluyuhan ni Davao City Mayor Sara Duterte ang sugyot nga magbaton ug unified QR Code System sa tibuok Davao Region.
Sa kasamtangan, daghan na ang mireklamo gumikan sa lain-laing mga gipatuman na QR Code system sa matag probinsya sa rehiyon, kung diin lain-laing QR code usab ang kinahanglan nga i-rehistro ug i-scan sa mga checkpoint alang sa mga mobyahe pasulod sa ilang tagsa-tagsa ka hurisdiksyon.
Sumala kang Mayor Inday Sara, uyon kini sa unified QR Code system gumikan kay nagtuo kini nga mas paspas ang contact tracing ilabi na nga gawas-sulod ang mga tawio sa syudad ug sa mga probensiya.
Sa kasamtangan, aduna nay inisyal nga panaghinabi ang Davao City, Island Garden City of Samal, ug ang Davao de Oro alang sa integrated system sa QR Code.
Sumala sa mayor, andam ang sistema sa Davao City QR aron ma-integrate sa sistema sa ubang LGU, apan kinahanglan una nga mapahapsay ang QR code system sa syudad ayha kini subling hisgutan gumikan kay sa karon nagpadayon pa ang registration niini.
Gikanayon usab sa Mayor nga kung buot mapatuman ang unified QR Code system sa tibuok Davao Region, kinahanglan nga mosunite ug rekomendasyon ang mga LGU sa Regional Interagency Task Force o RIATF, gumikan ka yang RIATF sumala pa maoy awtoridad nga magdesisyon sa mga polisiya nga adunay kalabutan sa Covid response sa rehiyon.
