DAVAO CITY – Magdugang sumala pa ang lokal nga kagamhanan ug lima pa ka mga Temporary Treatment and Monitoring Facilities (TTMFs) alang sa coronavirus diseases (Covid-19) patients kini human nga anaa na sa full capacity ang Southern Philippines Medical Center (SPMC).
Sumala pa kang Mayor Sara Duterte-Carpio kinahanglan ang dugang nga treatment facilities aron nga makuhaan o ma-unload ang SPMC.
Sumala sa Mayor nga gihan-ay na karon sa City Health Office (CHO) ang pipila ka lakang diin ang tanan nga mga asymptomatic patients nga dili na kinahanglan ma-admit sa hospital ang dili na lamang dad-on sa balay tambalanan ug hatagan na lamang ug prayoridad kadtong mas nagkinahanglan ug serbisyong medical sama sa mga pasyente nga kritikal o grabe ingon man ang pasyente asymptomatic apan talandugon ang kahimtang.
Nasayran nga kung matapos na ang dugang lima ka mga TTMFs, aduna nay kinatibuk-ang 11 ka mga treatment facilities ang siyudad.
