DAVAO CITY – Patay ang usaka 58 anyos nga babaye samtang samaron usab ang bana niini human natabunan sa nahugnong pader kagabii sa Hope Avenue, Diversion Road, Bangkal ning syudad sa Dabaw gumikan sa kusog nga pag-bundak sa ulan.
Gibutyag ni Carlos Fuerzas, 63 anyos – bana sa namatay nga biktima nga si Letecia Fuerzas, 58 anyos, alas 11:40 kagabii sa dihang kalit na lamang nahugno ang concrete retaining wall sa establisamento nga ilang gibantayan kung diin didto usab sila naga-tulog sa iyang asawa.
Subay sa inisyal nga imbestigasyon sa mga otoridad, posibling gumikan sa sunod-sunod nga pagbundak sa kusog nga ulan dinhi sa dakbayan sa Dabaw ang hinungdan sa maong panghitabo.
Posibling mihumok ang yuta nga maoy hinungdan sa pagkahugno sa kongretong pader.
Naka-angkon ug mga pangos sa kalawasan ang nahisgutang bana, apan walay swerte ang iyang asawa gumikan kay wala na kini kinabuhi sa dihang nakalutan atol sa gilusad nga clearing operation sa mga otoridad.
