DAVAO CITY Nagpadayon karon ang gipahigayon nga pagbakuna sa City Health Office (CHO) ug positibo ang ahensiya nga maangkon nila ang target nga 186,864 ka mga bata nga mabakunahan sa pagtapos sa “Sabayang Patak Kontra Polio” sa Agosto 2, 2020.
Sa unang semana sa ikalima ug final round kaniadtong Hulyo 20, nakatala ang CHO ug 174,082 nga nahatagan ug Oral Polio Vaccine (OVP) o 93.16 percent sa ilang target.
Sumala pa kang Dr. Julinda Acosta, head sa Technical Division sa CHO, nga sukad Hulyo 20, natala sab sa CHO ang 60,555 ka mga bata gikan sa District 1 nga nabakunahan; 60,591 gikan sa District 2; ug 52, 936 gikan sa District 3.
Nagapahigayon sab ang ahensiya ug house to house immunization aron masiguro ang istrikto nga health protocols batok sa Covid-19.
Gihatagan sab ang mga Health workers ug personal protective equipment (PPEs), face shield, face mask, ug sanitizing hand rubs.
Naglaom si Acosta nga maangkon ang siyudad ang target nga 186,864 children ayha ang Agosto 2.
