DAVAO CITY – Gipahugtan pa karon sa siyudad sa Mati ang ilang monitoring sa pork products nga nabaligya sa siyudad human nga natala ang kaso sa African Swine Fever (ASF) sa Panabo City.
Una ng nagpahigayon ug joint inspection operation sa Task Force Bantay Karne ug Provincial Veterinary Office sa mga nagkadaiyang establisyemento sa ilang lugar nga namaligya ug pork products.
Gipangunahan ang maong operasyon ni Dr. Marites B. Linsag-Erispe sa Mati City Veterinary Office ug Dr. Eric Dagmang sa Provincial Veterinary Office.
Atol sa ilang gipahigayon nga inspeksiyon, na-isyuhan nila ug final warning ang G4 Goods, Fortunato Meat Shop ug Kevin Masapa Dimsum Store gumikan sa kalapasan sa additional line of business nga nahilakip sa ilang original business permit.
Nakakumpiska sab sila ug 63 packs nga tocino ug 40 packs sa pork chorizo gikan sa Chona Magtuba Stall #002 ug Matildi Buico Stall gumikan sa kalapasan sa Republic Act No. 10536 o mas nailang “The Meat Inspection Code of the Philippines”.
Gipasalig sa ahensiya nga daghanan pang mga surprise inspections sa mga tindahan aron nga masiguro nga dili makasulod ang ASF sa Mati City.
Kahinumduman nga una ng gi-lockdown ang Barangay Cagangohan sa Panabo City sa milabay nga semana gumikan sa kaso sa ASF infection.
