DAVAO CITY – Gibutyag ni Dr. Jojit Marbas, District Doctor sa Calinan Health Center nga nag-negatibo ang 40 ka mga indibidwal nga taga Brgy. Pangyan Calinan District sa ilang gipailalom sa RDT Test kagahapon.
Ang mga nahisgutan maoy nakahimamat sa 29 anyos nga taga Brgy. Dalagdag nga nagpositibo sa covid-19 human nga miadto kini sa party.
Sumala pa kang Dr. Marbas, nga dali nila nga gipailalom kadtong adunay direct exposure sa pasyente apan susama nga negatibo ang mga nahisgutan.
Naka-quarantine na sab karon ang 80 ka mga indibidwal nga nakahimamat niini.
Kahinumduman nga mismong si Davao City Mayor Inday Sara Duterte–Carpio ang mikumpirma nga mitambong sa party ang maong pasyente hinungdan nga girekomenda niini nga mas maayong likayan una ang pag-imbitar ug mga silingan, higala o kaila panahon nga adunay birthday aron nga malikayan ang posibilidad nga matakdan ug virus.
Samtang una na sab nga gitambagan ni Dr. Leny Joy Rivera, asst. Regional director sa Department of Health (DOH) 11 ang mga indibidwal nga na-expose sa mga tao nga adunay Covid-19 nga dili magduha-duha nga mopailalom sa test aron nga malikayan ang community transmission sa virus
