DAVAO CITY – Gibutyag sa Bureau of Jail Management and Penology (BJMP)-Davao nga ang persons deprived of liberty (PDLs) nga dad-on sa ilang jail facilities kinahanglan nga mopailalom sa quarantine sulod sa isolation facility ayha i-ipon sa uban nga mga detainees.
Sumala pa kang BJMP-Davao spokesperson Jail Inspector Edo Lobenia nga sa milabay nga duruha ka semana sukad nga gisugdan ang pagdawal sa bag-ong PDLs, wala pa silay natala nga nagpositibo sa coronavirus disease (Covid-19).
Tanan sumala pa nila nga mga jail facilities sa rehiyon ang pabilin nga Covid-19 free ug ilang gipatuman ang hugtanon nga sumbanan sa screening sa mga PDLs aron malikayan ang outbreak sa mga presohan.
Apan ayha ang admission, kinahanglan nga mipailalom na ang mga PDLs sa 14 days mandatory quarantine period sa Philippine National Police (PNP) ug Philippine Drugs Enforcement Agency (PDEA) lock-up jails.
Gitataw ni Lobenia dili nila buot nga adunay kontaminasyon nga mahitabo sulod sa pasilidad ilabi na nga imposibleng mapatuman ang distancing sulod sa presohan sanglit nanghinobra ang populasyon sa mga peneriso.
Gani, aron nga mapabilin ang Covid-19-free status sa jail facilities, hugtanon nila karon nga gipatuman ang mga sumbanan sama sa limitado ang pagpasulod sa mga jail guards ilabi na kung miuli kini sa ilang mga panimalay kini aron masiguro nga dili carrier sa virus.
Una na sab nga gibutyag ni Pol. Col Kirby John Kraft, director sa DCPO nga anaa sa 100 ka mga peneriso gikan sa nagkadaiyang estasyon sa kapulisan ang gikatakdang ibalhin sa Davao City Jail nga dakong tabang aron nga malikayan ang paghuot sa mga peneriso.
