DAVAO CITY – Gi-andam na karon ang patong-patong nga kaso nga i-pasaka batok sa usa ka lalaki nga naghurumentado ug namusil sa ilang silingan kagahapong adlawa sa Purok Waling-waling Buhangin ning dakbayan sa Davao.
Kahinumduman nga tulo ang patay samtang angol usab ang lain pa nga mga biktima dihang namusil ang usa ka 66 anyos nga si Rolando Salazar, residente sa nahisgutan nga dapit.
Sa pagpakighinabi sa Bombo radyo sa amahan sa pamilyang Navarro nga si Tatay Rafael Navarro Sr. kinsa nakalinglawas sa pagpamusil, kalit lamang sila nga gisulod sa suspek nga ila ra usab nga silingan dayon gihimo na niini ang krimen.
Naila ang mga biktima nga sila si Ryan, 39 anyos ug Jeselle, 35 anyos nga mabdos dayon sila Rafael Jr, 33 anyos, Rusty 35 anyos ug asawa ni Tatay nga si Zusima 62 anyos.
Apan walay swerte ang magti-ayong Navarro tungod nakabsan sila sa kinabuhi samtang gidala sa ospital. Samtang ang tulo ang anaa sa kritikal nga kondisyon. Lakip sab nga napatay ang bugtong anak sa suspek nga si Nonoy Salazar, 41 anyos nga dead on arrival nga iya sab nga gipusil human siya gibadlong ug wala niya ma-ilhi tungod naka facemask kini.
Kasamtangan karon nga gipaslak sa presohan sa Buhangin PNP ang suspetsado. Una ng gibutyag ni Rafael Navarro Sr. kansa nakalingkawas sa insidente nga kalit na lamang nga mibutho ang suspek ug gipamusil sila niini hinungdan nga ubay-ubay sa mga biktima ang namatay samtang kritikal ang uban nga miyembro sa iyang pamilya.
