DAVAO CITY – Gikanayon ni Alfredo Baluran ang head sa City Disaster Risk Reduction and Management Office nga nangandam sab sila human nga nasinatian sa dakbayan sa kusog nga mga pag-ulan nga hatud sa Bagyong Ambo.
Sumala sa opisyal nga bisan nga dili direkta nga na-igo ang siyudad sa bagyo, apan sa sidlakan nga bahin sa Davao kini nagtigom ug kusog hinungdan nga nasinatian sab sa siyudad ang mga pag-ulan.
Gibutyag sa opisyal nga aduna silay natalang kusog nga mga pag-ulan sa bukiron nga bahin sa dakbayan kagahapong adlawa lakip na sa downtown area hinungdan nga ilang gimonitor ang sitwasyon.
Gikanayon sab sa opisyal nga kaniadtong milabay nga adlaw pa sila nagpahimangno sa mga katawhan nga nanimuyo daplin sa kasapaan ug tiilan sa bukid nga kanunay mag-igmat kini aron masiguro nga makapangandam ang mga nahisgutan ug dili mabutang sa risgo ang ilang kinabuhi sa higayon nga adunay masinatian nga pagsaka sa tubig sa mga kasapaan.
