DAVAO CITY – Nanawagan karon si Mindanao Development Authority Secretary Emmanuel Piñol ug tabang sa mga Mindanao leaders kini aron makunhuran ang suliran nga gi-atubang ni Pangulong Rodrigo Duterte dungan sa nagpadayon nga pakigbatok sa kagamhanan sa 2019 coronavirus disease (Covid-19).
Nanawagan kini sa mga lider nga sugdan ang agricultural production activities alang sa consumption ug kung mosobra, mamahimo nga gamiton alang sa relief operations.
Gi-awhag sab sa opisyal ang mga local government units (LGUs) nga sugdan sab ang pagpaningkamut pinaagi sa pagpatuman ug Self-Sustaining Food Security Strategy (SSFSS) nga gipangunahan sa MinDa.
Kabahin sa rekomendasyon sa SSFSS mao ang paggamit sa mga gobernador ug Mayors sa ilang Calamity Funds o i-realign ang pipila sa ilang budget aron nga masuportahan ang mga mag-uuma ug mananagat sa paghimo o pag-produce ug pagkaon.
Nanawagan sab kini sa mga mag-uuma ug mananagat nga padayon sa pagpananom ilabi na ang humay.
