DAVAO CITY – Gipasalig ni Department of Health (DOH) Davao regional Director Annabelle Yumang nga ang mga tawo nga adunay close interaction sa pasyente nga unang nag-positibo sa Corona-virus disease (Covid-19) dinhi sa rehiyon sa Davao ang gipailalom sa interview ug gi-assess pag-ayo karon sa kadumalahan sa Davao Regional Medical Center (DRMC).
Gihangyo na lamang nila karon kadtong adunay close contacts sa confirmed case nga makiglambigit pinaagi sa paghatag ug tukma nga impormasyon aron nga mapailalim gilayon kini sa medikasyon aron nga makontrola ang pagkatag sa sakit luyo sa dakong hagit sa tibuok kalibutan tungod sa maong balatian.
Sa kasamtangan, adunay 50 ka mga Person Under Investigation (PUI) ang rehiyon. Sa nahisgutan nga ihap, 29 niini ang na-discharged samtang 21 ang naka-admit sa duruha ka mga government hospitals sa rehiyon.
Anaa sab sa 25 PUIs ang nag-negatibo sa Covid-19.
Mikabat sab sa 13 ang naghulat pa ug resulta gikan sa RITM samtang pito ka mga samples ang gikatakda sab nga ipadala sa kaulohan alang sa eksaminasyon.
