DAVAO CITY – Hingpit nang gitak-upan sa konseho ning dakbayan sa Dabaw ang gilusad niining imbestigasyon labot sa gika-hugonhugonang hoarding o pagpanago ug mga face masks sa mga pharmaceutical companies.
Subay sa migawas nga resulta sa imbestigasyon sa Committee on Trade commerce and industry sa city council sa dakbayan sa Dabaw, walay nahitabong hoarding sa mga facemasks sa mga pharmaceutical companies ug mga supplier dakbayan sa Dabaw.
Hinuon, giangkon ni Councilor Nilo Abellera Sr, chair sa nahisgutang komitiba nga nangahurot ang supply sa facemasks gumikan sa pag-panic buying sa katawhan atubangan sa hulga sa coronavirus disease.
Subay niini, nakigsabot na ang mga supplier ug facemask nga makig-alayon ngadto sa lokal nga kagamjhanan alang sa pagpahigayon ug mass production ug dul-an 100,000 pieces nga facemasks matag semana sulod sa upat ka bulan.
Gibutyag usab ni Abellera nga gi-regulate na sa Department of Health (DOH) ug sa Food and Drus Administration (FDA) supply niini kauban ang Department of Trade and Industry (DTI) alang sa pag control sa presyo niini sa merkado.
