DAVAO CITY – Posibleng ang gihambin nga balatian ang hinungdan sa kamatayon sa usa ka 65 anyos nga lalaki nga nakit-ang wala na’y kinabuhi sulod sa iyang lawak sa Purok-13 Brgy. 25-C Quezon Boulevard.
Una niini, dali nga miresponde ang mga sakop sa Central 911 sa lugar human nga nakadawat ug impormasyon gikan sa pagumangkon sa biktima nga si Marjorie Pudpod nga dili na matud pa ma-contact sa iyang uyoan nga si Felicisimo Canilandya dihang mitawag ang anak niini nga anaa sa Quatar sukad sa milabay nga biyernes.
Gikanayong kagahapong adlawa lamang kini narespondehan hinungdan nga dihang nakita ang biktima sulod sa lawak niini, anaa na ang nahisgutan sa state of decomposition o pagkadugta.
Dugay na matud pa nga nag-antus sa sakit sa kidney ug kasing-kasing ang nahisgutan hinungdan nga posibleng kini ang hihinungdan sa iyang kamatayon.
Wala’y nakita usab nga foul play ang kapulisan sa kamatayon sa biktima. Gipahiluna na ang patay’ng lawas niini sa usa ka lokal nga punerarya ning siyudad.
