DAVAO CITY – Subling nanawagan ang Davao City Health Office (CHO) sa tanan nga mga ginikanan nga dad-on ang ilang mga anak nga nag-edad ug 5 anyos paubos sa tanan nga mga health centers alang sa Oral Polio Vaccine 2 (OPV) sanglit matapos na ang 4th Sabayang Patak Kontra Polio sa adlaw nga dominggo, Marso 1.
Sumala pa kang Dr. Josephine Villafuerte, head sa CHO, nga ang iyang buhatan nakatala ug 91 porsyento sa vaccination coverage sa kasamtangan nga round o mas ubos sa unang (97), second (104), ug third (108.87) rounds.
Target sumala pa sa CHO nga mabakunahan ang 186,864 ka mga bata sa matag round sa vaccination drive. Sa 4th round nga nagsugod kaniadtong Pebrero 17, nakatala na ang CHO ug 180,767 ka mga bata o 96.74 percent nga target.
Nakahimo sumala pa pagbakuna ang CHO teams ug 99.48 percent sa target number sa mga bata atol sa unang round; 105.11 percent sa second round; ug 108.87 percent sa third round.
Samtang gi-anunsiyo ni Villafuerte nga nagsugod na ang fifth ug final round sa Sabayang Patak Kontra Polio sa Marso 23. Ang final round moulungtad ug Abril 5 sa tanan nga barangay ug sa mga designated Patak centers.
Una ng gilugwayan sa kagamhanan ug duruha pa ka rounds human ang gika-report nga Type 1 polio case sa Bangsamoro Autonomous Region in Muslim Mindanao (BARMM).
