DAVAO CITY – Gipalawman pa karon sa kapulisan sa Babak, Island Garden City of Samal aron nga masayran kung si kinsa ang mipaluyo sa pagpusil patay sa usa ka 40 anyos nga lalaki kagahapong adlawa.
Una ng naila ang biktima nga si Mark Vincent Ybañez Rubio, alyas Marvey, minyo, walay trabaho ug residente sa Purok-3, Brgy. San Isidro, Babak District, IGACOS.
Nakaangkon sumala pa ang nahisgutan ug samad pinusilan sa ilang wala nga dughan, likod ug ulo nga maoy hinungdan sa iyang hinanali nga kamatayon.
Sa inisyal nga imbestigasyon sa kapulisan, nagmaneho lamang sa iyang motor ang biktima gikan sa San Isidro Elementary School ug pag-abot niya sa dapit diin nahitabo ang krimen, mibutho ang mga suspek ug gipusil sulod sa pipila ka higayon.
Human ang insidente, paspas nga misibat ang mga mamumuno sa wala matino nga direksiyon.
Narekober sa crime scene ang usa ka basiyo sa gikatuohang caliber .45mm. Sumala pa kang Police Major Romeo Mapanao, hepe sa IGACOS PNP, nalambigit sumala pa ang biktima sa illegal drug activities ug usa sa mga Drug Surrenderees sa Babak Police Sub-Station.
Gitudlo sab sumala pa kini nga suspek sa nahitabong duruha ka insidente sa pagpatay sa Babak District diin usa sa mga biktima mao si Benjie Jamili, 24 anyos, ulitawo, construction worker ug residente sa Malita, Davao Occidental. Suspek sab sumala pa kini sa extortion activities.
Ang patay’ng lawas sa biktima ang gipahiluna sa Montaño Funeral Parlor, Brgy. Villarica, Babak District, IGACOS.
