DAVAO CITY – Gipahimangnoan ni Davao City Overland Transport Terminal (DCOTT) manager Aisa Usop ang mga nanag-iya og bus nga kinahanglan hilingon niini pag-ayo ang mga dalang bagahe sa ilang mga pasahero ilabi na kadtong gipasakay lamang nila daplin sa dalan.
Gitumbok sa opisyal ang posibleng pagdala og mga karne ingon man mga hayop nga posibleng apektado sa African Swine Fever (ASF) nga hinungdan sa kamatayon sa liboan ka mga binuhing baboy sa Don Marcelino Davao Occidental.
Hinuon gipasalig ni Usop nga bisan kaniadto dugay na nila nga ginapatuman ang mga sumbanan aron lamang dili makalusot ang mga kontrabando nga walay igong permit.
Kalakip na niini ang mga hayop o mga punoan sa kahoy nga dili basta-basta nga ibiyahe kung walay permiso gikan sa mga hingtungdang ahensiya sa kagamhanan.
Kahinumduman nga una ng nag-mugna ang dakbayan og ASF Task Force nga maoy manguna sa himuon nga monitoring aron lamang dili makasulod sa siyudad ang ASF nga unang nakaapekto sa mga binuhing baboy didto sa kaulohan.
Pahayag ni Davao City Overland Transport Terminal (DCOTT) manager Aisa Usop.
