DAVAO CITY – Mihimo gilayon og aksiyon ang lokal nga panggamhanan sa Don Marcelino, Davao Occidental human nga nanukad mismo sa ilang lalawigan ang unang kaso sa African Swine Fever (ASF) sa Mindanao.
Kahinumduman nga nagpagula gilayon og kamandoan ang lokal nga kagamhanan sa lalawigan nga idili una ang pagpamaligya og binuhing baboy ingon man karne niini.
Sa kasamtangan, okupado ang ahensiya sa Department of Health (DOH) sa mga lakang nga kinahanglan himuon aron lamang mapugngan ang pagkatag sa maong sakit sa mga baboy.
Samtang mihimo na sab karon og mga lakang ang Office of the Civil Defense OCD eleven ug ang Regional Animal Disease Task Force.
Sa ulahing impormasyon, dul-an usaka libo ka mga binuhing baboy ang namatay gikan sa walo ka mga barangay sa lungsod sa Don Marcelino Davao Occidental.
Ang nahisgutang mga barangay ang gilangkuban sa Barangay Mabuhay, South Lamidan, Calian, Nueva Villa, Linadasan, North Lamidan, Lawa, ug Baluntaya.
Gipatuman na usab sumala pa karon sa tibuok lungsod ang pag-quarantine sa mga binuhing baboy sa nahisgutang dapit subay sa rekomendasyon sa Department of agriculture.
