DAVAO CITY – Hingpit nang gi-ablihan kagahapong adlawa sa publiko ang labing una nga paw park nga nahimutang sa Azuela Cove Lanang ning siyudad.
Ang nahisgutang parke ang gigahin alang sa mga hayop partikular na ang mga iro kini aron nga adunay kasuruyan ug maka-relax ang mga nahisgutan.
Sumala pa sa nagdumala niini nga Belgian Malinois Davao Inc. (BMDI), libre ang maong dapit nga mag-abli sugod sa alas siete sa buntag hangtud alas sais sa gabii.
Gitataw sab ni Quinn Martin Jarabelo, miyembro sa BMDI, nga ang pagtukod sa park giplano na sa milabay nga tuig.
Naglaom sila nga maganahan ang publiko sa maong parke ilabi na kadtong adunay mga hayop diin mamahimo nila kini nga makadula sa lugar.
Gipasalig sab ni Jarabelo nga luwas ang mga alagang hayop sulod sa park nga gipalibutan og koral.
Hinuon gipahimangnoan niini ang publiko nga kinahanglan limpiyohan niini ang hugaw nga ibilin sa ilang mga alaga.
Samtang gitataw sab sa BMDI nga dungan sa katukuran sa parke mao ang paghatag og kaalam sa publiko nga ang ilang mga alagang hayop kinahanglan sab nga magmalipayon ug nanginahanglan og igong oras aron nga maka-relax.
Gipahinumduman sab ni Jarabelo ang mga Dabawenyos nga kinahanglan “responsible pet owners” ang mga nahisgutan ug higugmaon nila ang ilang mga alaga sama sa pag-atiman nila sa ilang mga anak inay nga isulod kini sa kulongan.
