DAVAO CITY – Lig-on ug adunay nakitang basehan sa korte suprema aron nga ipasikop na ang mga opisyal ug giilang promoter sa Kapa-Community Ministry International (Kapa).
Una ng gibutyag sa Securities and Exchange Commission (SEC), nga mismong ang Department of Justice (DOJ) ang pormal nga miduso og kasong kriminal batok sa KAPA partikular na sa ilang mga opisyales ug promoters sa regional trial courts (RTC) sa Bislig City, Quezon City ug Rizal.
Sumala sa SEC, adunay nakitang igong basehan ang korte aron nga isyuhan og warrants of arrest ang mga akusado.
Sa lain nga reklamo nga giduso sa Bislig City Regional Trial Court Branch 29, gi-akusahan sa DOJ ang Kapa nga nagapangilad sanglit dili rehistrado ang ilang operasyon sa SEC.
Pipila sa mga gipasakahan og kaso ang gilangkuban nila ni KAPA founder ug president Joel Apolinario, trustee Margie A. Danao ug corporate secretary Reyna Apolinario gumikan sa kalapasan sa Republic Act No. 8799 o Securities Regulation Code (SRC).
Una na sab nga gipasakahan sa Department of Justice si Marisol Diaz, Adelfa Fernandico, Moises Mopia ug Reniones Catubigan tungod sa kalapasan sa SRC tungod sa pagpromotar og investment scam.
Susama sab nga reklamo ang giduso sa Rizal RTC tungod pa gihapon sa susama nga kalapasan.
