DAVAO CITY – Padayon ang mga sakop sa Bantay Dagat volunteers sa ilang pagpaningkamut aron lamang masiguro nga pabilin nga maprotektahan ang kadagatan sa bisan unsa man nga polusyon.
Kahinumduman nga una ng gibutyag sa grupo nga nakakolekta sila og average nga 1,200 ka sako sa basura gikan sa Davao Gulf matag bulan kaniadtong 2019.
Una ng gibutyag ni Paul Bermejo, Ancillary Services Unit (ASU) chief, kinahanglan nga dili magpataka og labay sa basura gumikan kay mopadulong lamang kini sa Davao Gulf.
Gikanayong pahugtan pa nila ang ilang pagpaningkamut karong tuiga ug tutokan ang pag-edukar gikan sa pinakaubos nga level sa katilingban.
Laraw sumala pa nila nga makunhuran ang basura ug ang tinubdan niini.
Sa kasamtangan gi-andam na matud pa sa ASU ang modules isip kabahin sa ilang education campaign.
Hatagan nila og prayoridad ang mga barangay nga nahimutang sa ibabaw nga bahin diin pahimangnoan ang mga nahisgutan nga likayan ang paglabay sa ilang basura bisan asa.
