DAVAO CITY – Nanawagan si National Telecommunication Commission (NTC) regional director Nelson Cañete ngadto sa publiko nga dili gilayon motuo sa mga madawat nga text messages o text scam nga nakadaug og dagkong pa-premyo.
Sumala pa kang Cañete, kuwestiyonable ang susama nga mensahe ilabi na kung masayud ka sa imong kaugalingon nga wala ka mi-apil sa bisan unsa man nga klase sa pa-promo.
Gitataw ni Cañete nga ang susama nga klase sa mga text messages usa ka klase sa scam hinungdan nga dili gilayon motuo ilabi na kung mangayo na kini og salapi bugti sa i-claim nga papremyo.
Kahinumduman nga hangtud karon pabilin pa gihapon nga suliran sa ahensiya ang mga reklamo nga makadawat sila og mga mensahe nga nakadaug sumala pa sila og mga papremyo gikan sa pa-raffle sa mga iladong kompanya.
