DAVAO CITY – Nasabtan sa Department of Education (DepEd) ang panawagan nga kinahanglan solusyonan ang isyu ug gaps sa pag-angkon sa quality basic education sa Pilipinas kini human nga nagpabilin pa gihapon nga anaa sa “poor” ang ranking sa reading comprehension dinhi sa nasod kung itandi sa international study.
Kini ang gibutyag sa DepEd human nga migula ang resulta sa 2018 Programme for International Student Assessment (PISA) Survey nga ang Pilipinas anaa sa rank “low” sa reading comprehension, mathematics ug science.
Sa nahisgutan nga survey, ang Pilipinas naka-score og 340 points sa reading comprehension.
Anaa sab sa second-lowest sa mathematics ang nasod nga anaa sa 353 points ug science nga adunay 357 points.
Ubos sumala pa kini sa 487 point-average alang sa reading, samtang 489 sa mathematics ug science.
Adunay kinatibuk-ang 79 ka mga nasod ug economies ang mipartisipar sa 2018 PISA Survey nga gipaluyohan sa Organisation for Economic Co-operation and Development (OECD), usa ka intergovernmental economic organization.
Sa kasamtangan gipalig-on pa sa ahensiya ang Sulong EduKalidad, usa ka DepEd program nga tumong ang pagpalambo sa basic education sa nasod.
