DAVAO CITY – Gihaya na karon sa usa ka punerarya sa Compostela Valley ang usa ka ginang kinsa gipusil mismo sulod sa iyang pinuy-anan kagabii.
Una ng naila ang biktima nga si Armie Angcot Bernardo, 33 anyos, minyo ug residente sa Purok 6, Barangay Poblacion Compostela Valley.
Sa ulahing imbestigasyon sa otoridad, anaa lamang sa ilang panimalay ang biktima dihang kalit nga mibutho ang duruha ka wala mailhing lalaki nga sakay sa motorsiklo.
Usa sa mga suspek ang nangita sa biktima hinungdan nga gitawag kini sa iyang anak nga si alyas Shane, 14 anyos.
Apan paggawas ni Armie kalit na lamang kini nga gipusil hinungdan nga dali kini nga nahagba ug nakutloan sa iyang kinabuhi.
Human ang gihimong krimen, paspas sab nga misibat ang suspek sa wala matino nga direksiyon.
Upat ka mga samad pinusilan ang naangkon sa biktima.
Nasayran nga dugay ng gipangita si Armie sa ilang balay apan wala lamang natungnan sanglit milakaw kini.
Una ng narekober sa otoridad sa crime scene ang upat ka basiyo sa wala pa matino nga kalibre sa armas.
Giimbestigahan pa karon sa otoridad ang motibo sa krimen.
