DAVAO CITY – Human ang pagkasikop sa tulo ka mga indibidwal nga nagpakatag ug sayop nga impormasyon kalabot tsunami nga maoy hinungdan sa pagbakwit sa mga residente kaniadtong bulan sa Oktubre, wala na matud pay nahipus nga impormasyon ang Davao City Disaster Risk Reduction Management Office (CDDRMO) nga adunay nagpakatag ug fake news sa bag-ohay pa lamang nga linog.
Sumala pa kang Rodrigo Bustillo, CDRRMO operations officer, daghanan na ang nagbaton ug leksiyon human ang panghitabo diin mamahimong makamulta ug mabilanggo ang mga magpataka og pakatag sa mga sayup nga impormasyon.
Nakatabang sab sumala pa niini ang kooperasyon sa mga nagkadaiyang ahensiya aron nga pabilin nga luwas ang publiko batok sa bisan unsa man nga risgo.
Angayan sab sumala pa nga magbinantayon ang publiko sa pagpost sa Social media ug dili gilayon motuo ilabi na kung wala naggikan ang impormasyon sa mga hingtungdan nga ahensiya sa kagamhanan.
Ilalom sa balaod, mamahimong mabilanggo og usa ka bulan ug usa ka adlaw ngadto na sa unom ka bulan gawas sa multa nga P40,000 ngadto na P200,000 ang mga tawo nga magpakatag og sayop nga mga impormasyon.
