DAVAO CITY – Gikatakda na nga ipang-apud apod ang mga hinabang nga dala sa Philippine Coast Guard (PCG) ug Department of Social Welfare and Development (DSWD) central office ngadto sa mga nabiktima sa linog sa Davao del Sur ug North Cotabato.
Sa kasamtangan, naabot na sa DSWD hub sa nahisgutan nga lalawigan ang 10 ka mga boom trucks nga puno ug relief goods nga alang sa mga biktima sa linog.
Sumala pa kang Lt. Angela Tobias, tigpamaba sa Task Force Tabang Mindanao, anaa sa 4,500 ka mga food packs ang ihatag sa Davao del Sur samtang 7,500 ang sa North Cotabato.
Gilangkuban sab ang maong hinabang ug 1,500 ka mga trapal ug 1,500 ka mga sleeping kits.
Gawas niini, nag-deploy sab sumala pa sila ug mga medical team aron nga sudlon katong mga hilit nga lugar aron nga matabangan kadtong mga pamilya anaa pa gihapon sa nahisgutan nga dapit.
