DAVAO CITY – Gipasalig sa bag-ong gipahimutang nga regional director sa Police Regional Office (PRO)-Davao nga si Police Brigadier General Filmore Escobal nga ipatuman niya ang zero tolerance batok sa mga badlungon nga pulis nga nalambigit sa ginadili nga droga.
Sumala pa kang Escobal nga subayon niya ang 10 ka mga pulis kalakip na ang tulo ka mga commissioned ug pito ka mga non-commissioned officers nga gikanayong nalambigit sa illegal nga droga.
Gikanayon sab sa opisyal nga tumanon nila ang direktiba sa officer-in-charge (OIC) sa Philippine National Police (PNP) nga si Police Lieutenant General Archie Gamboa nga ipatuman ang internal cleansing campaign luyo sa kontrobersiya nga gi-atubang sa PNP organization kalabot sa mga “ninja cops”.
Mahinungdanon sumala pa ang pagpatuman ug disiplina sa police unit aron nga maangkon nila ang ilang mga tumong.
Plano sab sa nahisgutan nga i-review ang performance sa tanan nga mga Provincial Directors ug City Director alang sa posibleng revamp o reshuffle sa nagkadaiyang probinsiya.
Gitataw sab ni P/Brig. Gen. Escobal nga dakong hagit ang tahas kaniya ilabi na nga sakop sa iyang Area of Responsibility ang pagbantay sa seguridad sa first family o kang Pangulong Rodrigo Duterte.
Samtang una na sab nga nagpasalamat si Police Brig. Gen. Marcelo Morales sa mga mihatag kaniya ug suporta ug nangayo og pasaylo sa mga sakop sa kapulisan gumikan kay nahimo sumala pa siyang kontrabida sa mga kinabuhi niini aron lamang nga mamahimong matinud-anon sa ilang pagpanerbisyo.
